ថ្ងៃអង្គារ ៩រោច ខែមិគសិរ ឆ្នាំរកា ព.ស២៥៦១ ត្រូវនឹងថ្ងៃទី ១២ ខែ ធ្នូ គ.ស ២០១៧
កិច្ចប្រជុំពិភាក្សាការងារជាមួយក្រុមការងារបច្ចេកទេសមកពីសាធារណៈរដ្ឋកូរ៉េ ស្ដីពី " ផែនការមេនៃការដឹកជញ្ជូនបៃតងក្នុងក្រុងនិង ការកែលម្អបណ្ដាញផ្លូវក្នុងខេត្ដសៀមរាប " ក្រោមអធិបតី ឯកឧត្ដម
ពិន ប្រាកដ អភិបាលរង នៃគណៈអភិបាលខេត្ដតំណាងដ៏ខ្ពង់ខ្ពស់ឯកឧត្តម បណ្ឌិត
ឃឹម ប៊ុនសុង អភិបាល នៃគណៈអភិបាលខេត្ដសៀមរាប និង លោក
គឹម ប៉ុណ្ណា ប្រធានមន្ទីរសាធារណការ និងដឹកជញ្ជូន នៅសាលប្រជុំលេខ២ សាលាខេត្ដ។
ខេត្តសៀមរាប នឹងមានហេដ្ឋារចនាសម្ព័ន្ធដឹកជញ្ជូនពណ៌បៃតង ដ៏ធំមួយនៅពេលឆាប់ខាងមុខនេះ ដើម្បីបង្កភាពងាយស្រួលដល់ការធ្វើចរាចរណ៍ដឹកជញ្ជូនទំនិញផ្សេងៗរបស់ប្រជាពលរដ្ឋ
ថ្លែងនៅក្នុងកិច្ចពិភាក្សាបញ្ចប់ការសិក្សាបច្ចេកទេស នៃគម្រោងដឹកជញ្ជូនពណ៌បៃតង និងការកែលំអប្រព័ន្ធប្លង់មេក្នុងក្រុងសៀមរាប នៅថ្ងៃអង្គារ ៩រោច ខែ មិគសិរ ឆ្នំារការ នព្វស័ក ព.ស២៥៦១ត្រូវថ្ងៃទី១២ ខែធ្នូ គ.ស២០១៧នេះ លោក ពិន ប្រាកដ អភិបាលរងខេត្តសៀមរាប បានមានប្រសាសន៍ថា រាជរដ្ឋាភិបាលកម្ពុជាមានគម្រោងសាងសង់ហេដ្ឋារចនាសម្ព័ន្ធដឹកជញ្ជូនពណ៌បៃតង ឬផ្លូវក្រវ៉ាត់ក្រុងសៀមរាបដ៏ធំមួយនៅផ្នែកខាងត្បូងក្រុងសៀមរាប ស្របតាមបឹងទន្លេសាប ចាប់ពីស្រុកប្រាសាទបាគង ទៅដល់ស្រុកពួក ដែលមានពីរគន្លងប្រវែងសរុប៤២គីឡូម៉ែត្រ និងមានទទឹងប្រវែង១៣ម៉ែត្រ ប្រភេទកៅស៊ូAC និងមានសំណង់សិល្បៈមួយចំនួន។
លោកបានមានប្រសាសន៍ទៀតថា គោលបំណងនៃគម្រោងនេះ គឺដើម្បីផ្តល់ដំណោះស្រាយដល់ការដឹកជញ្ជូននិងការស្តាឱ្យប្រសើរឡើងវិញនូវហេដ្ឋារចនាសម្ព័ន្ធដឹកជញ្ជូនក្នុងទីក្រុងសៀមរាប ការអភិវឌ្ឍន៍លក្ខខណ្ឌបច្ចេកទេស ចរាចរណ៍ ការដឹកជញ្ជូន ដើម្បីទាក់ទាញភ្ញៀវទេសចរ និងបង្កើនភាពងាយស្រួលរបស់ប្រជាពលរដ្ឋ ហើយគម្រោងសាងសង់ហេដ្ឋារចនាសម្ព័ន្ធដឹកជញ្ជូនពណ៌បៃតងនេះ ត្រូវបានធ្វើការសិក្សាបច្ចេកទេសដោយអ្នកជំនាញកូរ៉េ ហើយបន្ទាប់ពីការបញ្ចប់ការសិក្សានេះ រាជរដ្ឋាភិបាលកម្ពុជា និងស្វែងរកដៃគូអភិវឌ្ឍក្នុងការយកថវិកាមកអនុវត្តគម្រោងនេះឲ្យបានឆាប់ៗនាពេលខាងមុខនេះ ខណៈដែលបច្ចុប្បន្ននេះ ឃើញថា រដ្ឋាភិបាលកូរ៉េអាចជាដៃគូក្នុងជួយគម្រោងសាងសង់ហេដ្ឋារចនាសម្ព័ន្ធដឹកជញ្ជូនពណ៌បៃតងនេះ។
លោកស្រី សាង មីលី តំណាងឱ្យរដ្ឋាភិបាលនៃសាធារណរដ្ឋកូរ៉េ បានមានប្រសាសន៍ថា ទំនាក់ទំនងការទូតកម្ពុជា-កូរ៉េ បច្ចុប្បន្ននេះ គឺកាន់តែមានភាពល្អប្រសើរ ហើយកន្លងមករដ្ឋាភិបាលកូរ៉េក៍បានផ្តល់ជំនួយដល់ប្រជាពលរដ្ឋកម្ពុជាជាបន្តបន្ទាប់ដែរ ហើយចំពោះគម្រោងសាងសង់ហេដ្ឋារចនាសម្ព័ន្ធដឹកជញ្ជូនពណ៌បៃតងនេះ អ្នកជំនាញកូរ៉េ ក៏បានជួយធ្វើការសិក្សាបច្ចេកទេស ដែលត្រូវបានពិភាក្សាបញ្ចប់នៅថ្ងៃនេះ ។
លោកស្រី សាង មីលី បានបញ្ជាក់ទៀតថា សម្រាប់ការស្វែងរកដៃគូអភិវឌ្ឍក្នុងការយកថវិកាមកអនុវត្តគម្រោងរបស់កម្ពុជា លោកស្រីរំពឹងថា រដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋកូរ៉េ នឹងពិភាក្សាគ្នា និងឈានទៅរកភាពល្អប្រសើរមួយក្នុងការអនុវត្តគម្រោងនេះ ៕
