គ្រោះថ្នាក់ចរាចរណ៍បានបណ្តាលឲ្យប្រជាពលរដ្ឋកម្ពុជាបាត់បង់ជីវិតស្ទើររាល់ថ្ងៃ ហើយកត្តាបង្កឲ្យមានគ្រោះថ្នាក់ចរាចរណ៍មានដូចជាបើកបរលើសល្បឿនកំណត់ ជែង បើកបរមានក្នុងស្ថានភាពស្រវឹង និងកត្តាយានយន្តជាដើម។
ការបង្កគ្រោះថ្នាក់ចរាចរណ៍ឲ្យមានអ្នកស្លាប់ ឬរបួសនឹងមានទោសទណ្ឌរហូតដល់ជាប់ពន្ធនាគារ។ តាមច្បាប់ចរាចរណ៍ផ្លូវគោកត្រង់មាត្រា៨៣ ចែងថាជនណាបើកបរខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចមានចែងក្នុងច្បាប់ចរាចរណ៍បណ្តាលឲ្យរបួសអ្នកដទៃមិនអាចធ្វើការបានស្មើ ឬលើសពី៨ថ្ងៃពីថ្ងៃកើតហេតុត្រូវផ្តន្ទាទោសជាប់ពន្ធនាគារពី៦ខែទៅ២ឆ្នាំ។ ជាមួយគ្នានេះដែរត្រូវពិន័យជាប្រាក់ពី២លានរៀល ទៅ១០លានរៀល។
អំពើល្មើសនេះ នឹងត្រូវផ្តន្ទាទោសពី១ឆ្នាំទៅ៣ឆ្នាំ និងពិន័យជាប្រាក់ពី៤លានទៅ១៥លានរៀលចំពោះអ្នកបើកបរគ្មានបណ្ណបើកបរឬបណ្ណមិនត្រឹមត្រូវតាមប្រភេទយាន្ត បើកបរដោយស្ថិតក្នុងសភាពស្រវឹង ការរត់គេចពីខ្លួនពីកន្លែងកើតហេតុក្នុងគោលបំណងមិន ទទួលខុសត្រូវ និងក្នុងករណីបណ្តាលឲ្យមនុស្សស្លាប់ច្រើននាក់។
ចំពោះមាត្រា៨៥ វិញចែងថាជនណាបើកបរខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចមានចែងក្នុងច្បាប់ចរាចរណ៍បណ្តាលឲ្យស្លាប់អ្នកដទៃត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់៤លានទៅ១៥លានរៀល រួចអាចមានផ្តន្ទាទោសបន្ថែមមួយឬច្រើនទៅតាមមាត្រា៥៣នៃក្រមព្រហ្មទណ្ឌ។
អំពើល្មើសនេះ នឹងត្រូវផ្តន្ទាទោសពី២ឆ្នាំទៅ៥ឆ្នាំ និងពិន័យជាប្រាក់ពី១០លានទៅ២៥លានរៀលចំពោះអ្នកបើកបរគ្មានបណ្ណបើកបរឬបណ្ណមិនត្រឹមត្រូវតាមប្រភេទយាន្ត បើកបរដោយស្ថិតក្នុងសភាពស្រវឹង ការរត់គេចពីខ្លួនពីកន្លែងកើតហេតុក្នុងគោលបំណងមិនទទួលខុសត្រូវ និងក្នុងករណីបណ្តាលឲ្យមនុស្សស្លាប់ច្រើននាក់៕
អត្ថបទ៖ ទូច សុខា
0 comments:
Post a Comment