បន្ទាប់ពីចំណាយពេលសិក្សាបឋមរយៈពេល៦ខែ ទៅលើការសាងសង់ផ្លូវរថភ្លើងពីភ្នំពេញ ទៅសៀមរាប-ស៊ីសុផុន ដោយក្រុមហ៊ុន CRCC 17th ឆាប់ៗខាងមុខកម្ពុជានឹងមានផ្លូវរថភ្លើងថ្មីមួយទៀតហើយ។ ចំណែកឯប្រជាពលរដ្ឋចង់ទៅលេងខេត្តសៀមរាប ក៏អាចធ្វើដំណើរតាមរថភ្លើងបានដែរ។ នេះបើតាមទំព័រហ្វេសប៊ុកផ្លូវការរបស់ក្រសួងសាធារណការ និងដឹកជញ្ជូន។
សូមជម្រាបជូនថា នៅថ្ងៃទី២១ ខែវិច្ឆិកា ឆ្នាំ២០១៧ ឯកឧត្ដមទេសរដ្ឋមន្ត្រី ស៊ុន ចាន់ថុល បានជួបពិភាក្សាជាមួយគណៈប្រតិភូមួយក្រុមរបស់ក្រុមហ៊ុន CRCC 17th ដែលដឹកនាំដោយលោក Lu Peng ប្រធានក្រុមប្រឹក្សានៃក្រុមហ៊ុននេះ។ ក្នុងនោះក៏មានការចូលរួមពីអ្នកឧកញ៉ា គិត ម៉េង ប្រធានក្រុមហ៊ុនRoyal Group និងជាប្រធានសភាពាណិជ្ជកម្មកម្ពុជា។ ជំនួបពិសេសនេះ គឺដើម្បីធ្វើការសិក្សាឲ្យកាន់តែច្បាស់អំពីគម្រោងសាងសង់ផ្លូវដែកថ្មី ពីភ្នំពេញទៅសៀមរាប-ស៊ីសុផុន។
ឯកឧត្ដមទេសរដ្ឋមន្ត្រី ស៊ុន ចាន់ថុល បានលើកឡើងថា គម្រោងនេះមានសារសំខាន់ខ្លាំង សំដៅបង្កភាពងាយស្រួលដល់ការដឹកជញ្ជូននិងការតភ្ជាប់ និងជំរុញការអភិវឌ្ឍវិស័យផ្លូវដែកនៅកម្ពុជា។
យ៉ាងណាក្ដី ចំពោះទំហំថវិការដែលនឹងគ្រោងចំណាយ ទៅលើគម្រោងមួយនេះនៅមិនទាន់បានបញ្ជាក់នៅឡើយទេ។ ចំណែកឯថ្ងៃបើកការដ្ឋាន កំពុងស្ថិតក្នុងដំណាក់កាលសិក្សានៅឡើយ៕
អត្ថបទ៖ ថោ ច័ន្ទឬទ្ធិ
0 comments:
Post a Comment