សម្តេចតេជោ ហ៊ុន សែន អញ្ជើញចូលរួមបើកការដ្ឋានស្ថាបនាផ្លូវជនបទក្រាលកៅស៊ូ និងបេតុង
កាលពីថ្ងៃទី ២ វិច្ឆិកា ព្រឹកមិញនេះ សម្តេចតេជោ ហ៊ុន សែន
នាយករដ្ឋមន្រ្តីនៃព្រះរាជា
ណាចក្រកម្ពុជាបានអញ្ជើញចូលរួមក្នុងពិធីបើកការដ្ឋានស្ថាបនាផ្លូវជនបទក្រាលកៅស៊ូ
និងបេតុងប្រវែង ១,២០០ គ.ម និង
ប្រកាសដាក់ឲ្យប្រើប្រាស់ផ្លូវជនបទក្រាលកៅស៊ូពីរជាន់ (DBST) ប្រវែងសរុប ៥៤៣
គ.ម ជានិមិត្តរូប នៅខេត្តត្បូងឃ្មុំ
ស្ថិតក្នុងក្របខណ្ឌគម្រោងកែលម្អផ្លូវជនបទ។
ពិធីបើកការដ្ឋានស្ថាបនាផ្លូវជនបទនេះគឺជានិមិត្ត រូបតំណាងឲ្យខេត្ត ចំនួន
៩ ទៀត គឺខេត្តកំពង់ចាម កំពង់ធំ សៀមរាប បន្ទាយមានជ័យ បាត់ដំបង ពោធិ៍សាត់
កំពង់ឆ្នាំង កំពង់ស្ពឺ និងខេត្តតាកែវ
ព្រមទាំងប្រកាសដាក់ឲ្យប្រើប្រាស់ជាផ្លូវការនូវផ្លូវជនបទក្រាលកៅស៊ូពីរជាន់ប្រវែង
៥៤៣ គ.ម តំណាងឲ្យខេត្តចំនួន ៧ ផ្សេងទៀត គឺខេត្តកំពង់ចាម កំពង់ធំ សៀមរាប
បាត់ដំបង ពោធិ៍សាត់ កំពង់ឆ្នាំង និងខេត្តកំពង់ស្ពឺ។
ផ្លូវក្រាលកៅស៊ូពីរជាន់ និងបេតុងនេះគឺបានរួមចំណែកយ៉ាងខ្លាំងក្នុងការអនុវត្តយុទ្ធសាស្រ្តចតុកោណដំណាក់កាលទី ៣ របស់រាជរដ្ឋាភិបាល ពិសេសបានជួយលើកកម្ពស់កម្រិតជីវភាពរស់នៅរបស់ប្រជាជនជនបទ ព្រមទាំងបានរួមចំណែកក្នុងការបង្ខិតគម្លាតរវាងទីក្រុង និងជនបទបានមួយចំណែកទៀត ផងនោះ។ ធនាគារអភិវឌ្ឍន៍អាស៊ីបានផ្តួចផ្តើមសហការជាមួយដៃគូអភិវឌ្ឍន៍នានា បន្តគាំទ្រឲ្យមានគម្រោង កែលម្អផ្លូវជនបទជំហានទី ២ ដោយមានថវិកាសរុប ចំនួន ១៩២,៧១ លានដុល្លារ ដែលក្នុងនោះ មាន ហិរញ្ញប្បទានសរុប ១៤២ លានដុល្លារ និង ហិរញ្ញប្បទានជាជំនួយឥតសំណងចំនួន ៣២,៩២ លានដុល្លារ សម្រាប់អនុវត្តន៍រយៈពេល ៦ ឆ្នាំ គឺចាប់ពីឆ្នាំ ២០១៥-២០២០ ដែលក្នុងនោះមានប្រភពមកពី៖
1-បដិភាគរាជរដ្ឋាភិបាលកម្ពុជា ថវិកាចំនួន ១៧,៧៩ លានដុល្លារអាមេរិក
2-ហិរញ្ញប្បទានរបស់ធនាគារអភិវឌ្ឍន៍អាស៊ី ថវិកាចំនួន ៥៤ លានដុល្លារអាមេរិក
3-ហិរញ្ញប្បទានរបស់សាធារណរដ្ឋកូរ៉េ ថវិកាចំនួន ៤១ លានដុល្លារអាមេរិក
4-ហិរញ្ញប្បទានរបស់សាធារណរដ្ឋបារាំង ថវិកាចំនួន ៤០ លានដុល្លារអាមេរិក
5-ហិរញ្ញប្បទានជាជំនួយឥតសំណងរបស់រដ្ឋាភិបាលអូស្រ្តាលី ១៨,៥២ លានដុល្លារអាមេរិក
6-ហិរញ្ញប្បទានជាជំនួយឥតសំណងរបស់មូលនិធិយុទ្ធសាស្រ្តអាកាសធាតុ ចំនួន ៩ លានដុល្លារ និង ឥណទានចំនួន ៧ លានដុល្លារអាមេរិក
7-ហិរញ្ញប្បទានជាជំនួយឥតសំណងរបស់មូលនិធិអភិវឌ្ឍន៍ណ័រឌីក ថវិកាចំនួន ៥,៤ លានដុល្លារ។
សម្តេចតេជោ ហ៊ុន សែន នាយករដ្ឋមន្រ្តីបន្តខិតខំយកចិត្តទុកដាក់ដើម្បីកសាងបណ្តាញផ្លូវថ្នល់អោយបានច្រើនថែមទៀត នៅទូទាំងប្រទេស ដើម្បីពលរដ្ឋកាន់តែងាយស្រួលក្នុងការធ្វើដំណើរ ក៏ដូចជាការប្រកបរបររកស៊ីទទួលទានផ្សេងៗដើម្បីជីវភាពរស់នៅកាន់តែប្រសើរឡើង៕
0 comments:
Post a Comment